Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Goranboy, Göygöl, Hacıqabul, Saatlı, İsmayıllı, Zərdab, Zaqatala Uşaq və Ailələrə Dəstək Mərkəzləri (UADM) tərəfindən erkən nikahların və qızların təhsildən yayınmasının qarşısının alınması, məişət zorakılığına qarşı mübarizə istiqamətində maarifləndirmə işlərinin aparılması məqsədilə silsilə tədbirlər keçirilib.

Komitədən bildirilib ki, Uşaq və Ailələrə Dəstək mərkəzləri, Heydər Əliyev mərkəzləri, təhsil müəssisələri və ictimai yerlərdə keçirilən tədbirlər və maarifləndirmə aksiyalarında mərkəzlərin əməkdaşları, Rayon İcra Hakimiyyətinin, rayon gənclər və idman idarələrinin, Gənclərin İnkişaf və Karyera mərkəzlərinin nümayəndələri, məktəblilər, könüllülər iştirak ediblər.

Tədbirlərdə qızların təhsil almasının əhəmiyyətindən, erkən evliliyin sağlamlığa vurduğu zərərlərdən, Azərbaycan qanunvericiliyi ilə müəyyən olunmuş uşaqların hüquqları barədə ətraflı məlumat verilib.

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Yeni Həyat” Humanitar və Sosial Dayaq İctimai Birliyi tərəfindən icra olunan “Məişət zorakılığına qarşı birlikdə mübarizə aparaq!” adlı layihə çərçivəsində İsmayıllı və Saatlı rayonlarında dəyirmi masa təşkil edilib. Tədbirlərdə məişət zorakılığının başvermə səbəbləri, növləri, müdafiə və mübarizə üsullarından danışılıb. Mövzunun izahını əks etdirən video material nümayiş etdirilib, iştirakçılara “Məişət zorakılığına qarşı birlikdə mübarizə aparaq” adlı kitabça və buklet paylanılıb.