Kənd təsərrüfatı

Saatlıda intensiv alça bağında çiçəklərin mayalanması üçün bal arısı və ya bombus arılarından istifadə olunacaq

Saatlıda intensiv alça bağında çiçəklərin mayalanması üçün bal arısı və ya bombus arılarından istifadə olunacaq

Saatlıda yerləşən intensiv alça bağında mövsümə uyğun aqrotexniki qulluq işlərinə başlanılıb.

14 hektar ərazidə salınan intensiv alça bağı Saatlı rayonunun Qaralar kəndində yerləşir. Bağda Naxçıvan göycəsi adı ilə tanınan alça növü yetişdirilir. Ağaclardan bol məhsul götürmək üçün 15 günə yaxındır mövsümi qulluq işlərinə start verilib. Dördüncü yaş dövründə olan ağacların artıq budaqlardan təmizlənməsi işləri görülür.

Aqronom Murat Yurtal bildirir ki, aqrotexniki qaydalara uyğun olaraq ağaclarda bir neçə bar budağı saxlanılır. Bar budaqlarının Günəş şüası qəbul edə bilməsinə diqqət yetirilir: “Ağacların orta ömrü 20 il nəzərdə tutulub. Budama edirik ki, ağaclar bu müddətdə eyni keyfiyyətdə, eyni məhsuldarlıqda məhsul verə bilsin. Həmçinin bu, xəstəliklərə, ziyanvericilərə qarşı da effektivdir. Ağaclar budandıqda yaxşı Günəş işığı qəbul edir, budaqlararası havalanma sürətlənir və nəmişlik olmur. Budama işləri bitdikdən sonra aqrotexniki qaydalara uyğun olaraq digər işlər görüləcək”.

Bağdan torpağın ehtiyacı olan mineralların öyrənilməsi üçün analiz də götürüləcək. Bununla da torpağa lazım olan makro və mikro elementlər məlum olacaq. Prosesin daha keyfiyyətli aparılması üçün damcılı suvarma şəbəkəsindən də istifadə ediləcək. Mayalanma prosesi də nəzərə alınıb. Belə ki, bu prosesin əlverişli hava şəraiti olarsa, bal arısı, digər halda isə istixanalarda istifadə olunan bombus arıları ilə aparılması nəzərdə tutulub.

Saatlının iqlimi məhsulun daha tez yetişməsinə və bazara daha tez çıxarılmasına imkan verəcək.

Təsərrüfat sahibi Həbib Əhmədov deyir ki, ötən il bağdan 30 ton məhsul tədarük olunub. Cari ildə isə hədəf 50 tona yaxın məhsul götürülməsidir. Onun sözlərinə görə, ötən il yığılan məhsulun ölçüsü nisbətən kiçik olmuşdu. Ona görə də bazarda tələbat az idi. Bu il isə buna xüsusi diqqət yetirilir. Görülən qulluq işləri məhsulun keyfiyyətinə və ölçüsünə də təsir göstərəcək.

Sosial şəbəkələrdə paylaş: