Saatlıda Türkiyədən gətirilən “Eşmə” heyva növü yetişdirilib. Hazırda bağda yığım aparılır və ilk məhsul ilində hələlik 120 tondan çox meyvə toplanılıb.

İntensiv heyva bağı 2020-ci ildə Saatlı rayonunun Qaralar kəndi ərazisində salınıb və bu il bağdan ilk dəfə məhsul yığılır.

Türkiyədən gətirilən tinglər hesabına salınan 27 hektarlıq intensiv heyva bağının sahibi Həbib Əhmədov bildirib ki, bağın salınması üçün əvvəlcə torpaqdan analiz götürülüb, sonra tirə üsulu ilə 54 min ting əkilib: “İki il çəkilən əziyyət öz bəhrəsini verib. İlk məhsul ilində gözləntilər 150 tonun üzərindədir və artıq 120 ton məhsul yığılıb. Meyvələr əsasən xarici bazarlar üçün nəzərdə tutulub və ilkin mərhələdə 20 tona qədər məhsul ixrac olunub. Lakin yollarla bağlı çətinlik olduğu üçün hazırda məhsullar saxlama kameralarına yığılır və növbəti aylarda proses davam etdiriləcək. Növbəti ildə isə 400 ton və daha çox məhsul yığılması nəzərdə tutulub”.

Bağ nəzarətçisi İsmayıl Ağayevlə də söhbət edirik. O, bol məhsul əldə etməyin yollarından danışaraq deyib ki, intensiv bağda lazımi aqrotexniki qaydalara əməl olunub, mütəmadi olaraq aqro-kimyəvi qulluq işləri aparılıb. Ziyanvericilərə qarşı, həmçinin sağlam məhsul əldə etmək üçün yemləmə gübrələrindən istifadə edilib, budama işləri görülüb. Nəticədə heyva ağacları bol məhsul verib.

Dövlət tərəfindən bağçılığa olan xüsusi diqqət bu sahəyə marağı daha da artırır. Belə ki, hər hektara 850 manat subsidiya verilir. Bu vəsait hesabına lazımi gübrələr alınır və bağda becərmə, dərmanlama, qulluq işləri görülür.

Bağın salınması həm də əlavə iş yerlərinin açılmasına imkan yaradıb. Hazırda bağda yerli sakinlər daimi işçi kimi çalışırlar. Mövsümi işlərlə əlaqədar isə əlavə işçilər də cəlb olunur.