Rəssam Sürəyya Zeynalova Saatlı sakinidir. Onun yaradıcılığında sürrealizmə aid əsərləri xüsusi yer tutur. Həmin əsərlər xarici ölkələrdə sərgilənib. Hazırda Sürəyya Zeynalova ərsəyə gətirdiyi sonuncu 5 əsəri ilə növbəti dəfə beynəlxalq rəsm sərgisinə hazırlaşır.

Müxtəlif mövzularda rəsmlər çəkən Sürəyya Zeynalova əsərlərində Cənubi Qafqaz mifologiyasına, Asiya və Cənubi Amerikanın dini inanclarına da yer verir. O, işlədiyi mövzuları subyektiv baxış bucağı və fərdi yanaşması ilə ərsəyə gətirir. Məhz buna görə rəsmlər dərin düşüncəni özündə əks etdirir. Sürəyya Zeynalova deyir ki, əsərləri parça üzərində, xüsusi, zərər görməyən boyalarla işləyib: “Bir neçə fikir, müxtəlif formada, kombinasiyalı şəkildə izah olunub. Bir əsərdə dünyanın yaranması prosesi öz əksini tapır. Yəni həyat sudan başlayıb və həyatın yaranmasına təsir edən güclər əsərdə təsvir olunub”.

Sürrealist rəssam bildirir ki, işlədiyi mövzuları fərdi təxəyyülü ilə izah etməyə çalışır: “Mən insan şüurunun və onun bədii ifadəsini məhdudlaşdıran perspektivliyi aşan, yaxud ondan qaçan əsərlər yaratmağa çalışıram. İnsanlar üçün real görünən, gözlə görünən adiləşib. Belə əl işləri insanlar üçün maraq doğurmaya bilər. Bir rəssam olaraq fikirlərin obrazlarını çəkirəm, həm də hər hansı texnologiyanın edə bilmədiyi səviyyədə. Bu səbəbdən əsərə fikir gətirirəm, eyni zamanda, əsərdə yaranan fikir içərisində digər fikir öz əksini tapır. Bizim mifologiyamız çox zəngindir. Buna görə əl işləri heç də asan başa gəlmir. Mövzudan asılı olaraq hazırlanması bir neçə gün, hətta bir aydan artıq vaxt tələb edir. Bu əsərlər xüsusilə beynəlxalq sərgilərdə böyük maraqla qarşılanır”.

Rəssamın daha əvvəllər də bir neçə dəfə fərdi sərgisi keçirilib. “Bu yaxında ABŞ-da fərdi sərgim oldu. Daha sonra Gürcüstanda 10 əsərim nümayiş olunub. Üç nəfər rəssam Azərbaycanı təmsil edirdi, biri də mən idim. Bundan əlavə, Moskvada, Sankt-Peterburqda, Kazanda əsərlərim sərgilənib. Hazırda son 5 əsərimin xaricdə keçiriləcək beynəlxalq sərgiyə aparılması nəzərdə tutulub”, - deyə Sürəyya Zeynalova bildirib.

Qeyd edək ki, bu işləri peşəkar rəssamdan mənimsəyən ardıcılları da var. Rəssamın istəyi də bu işi daha da genişləndirərək, yaradıcılığı ilə müxtəlif beynəlxalq sərgilərdə ölkəmizi daha böyük miqyasda təmsil etməkdir.